Femínistar hata mig?!

Morgunblaðið er á femínískum nótum þessa dagana. Í sunnudagsblaðinu fjallaði Halldóra Björt Ewen um femínísma í pistli sínum um íslenskt mál undir yfirskriftinni Femínistar hata karla.  Fyrirsögnin er ágætt skot á fólk sem les bara fyrirsagnir og talar í upphrópunum. En í pistlinum kennir margra grasa og þar er meðal annars þessi klausa: „Einhverjir kunna að verða undrandi á að hér sé um málvillur að ræða en eins og lesendur vita mæta vel er tungumálið valdatæki og ef vitleysur eru látnar óáreittar er hætta á að fólk fari að líta á þær sem sannindi og það er hættulegt, bæði fyrir tungumálið og okkur sem notum það.“ (feitletrun mín).

Bókmenntasérfræðingurinn Kolbrún Bergþórsdóttir skrifar svo í dag um matreiðsluþátt Nigellu Lawson og tínir til marga góða kosti hennar, en í veikburða tilraun til fyndni og hugsanlega til að ögra einhverjum, bætir hún við þeirri staðhæfingu að hún sé uppskrift að konu sem femínistar þola ekki. Vissulega er Nigella umdeild og hefur sætt gagnrýni. Sjálf telur hún sig femínista. Sínum augum lítur hver á silfrið.

En ég get ekki látið þessa vitleysu í Kolbrúnu óáreitta. Ég er svo heppinn að vera mörgum þessara kosta gæddur, sem hún telur að femístar hati. Ég er frekar fallegur, oftast góður og skilningsríkur, þokkalega brosmildur og elda oft fyrir fjölskyldu mína.  Auðvitað gæti ég svarað í sömu mynt með álíka heimskuhjali um meinta óbeit á Kolbrúnu en ég geri það ekki, vegna framangreindra kosta minna.  Ég er líka aumingjagóður.

Enn hef ég ekki orðið var við hatur femínista, en dagurinn er jú rétt nýbyrjaður.

Auglýsingar

7 athugasemdir við “Femínistar hata mig?!

  1. Mér finnst soldið skuggalegt að þessi Nigella, sem Kolbrún lýsir í úrklippunni, er alveg eins og maðurinn minn í eldhúsinu! (Hef aldrei horft á Nigellu en oft horft á manninn elda enda er eldhúsið hans.) Þýðir þetta háttalag að maðurinn minn sé ekki femínisti? Og er það slæmt?

  2. Raunar datt mér í þessu í hug annar möguleiki: Er Nigella kannski karl? (Dettur raunar í hug enn verri möguleiki til skýringar en birti hann ekki á opinuberum vettvangi …)

    Eftir pistil fr. Ewen hef ég ákveðið að hætta að reyna að lesa málfarspistla moggans, þeir fara svo í taugarnar á mér. (Ég hugsa að það sé útaf þessum mastersprófum sem ég hef í íslensku eða uppeldi í norðlenskri sveit en í svoleiðis umhverfi ku fólk tala „kjarngott íslenskt mál“, hef ég lesið í gömlum Ferðafélagsbókum. Líklega eru pistlarnir skrifaðir fyrir einhverja óskilgreindan ómenntaðan lágstéttaralmúga, sem ég hef aldrei kynnst á ævinni, þrátt fyrir fjölbreytt störf til sjávar – ef frystihús teljast með – og sveita – ef hótel úti á landi teljast með-, auk allskonar verkamannastarfa í borg óttans. Satt best að segja hef ég ekki glóru um hvar markhópur málfarspistla moggans gæti mögulega haldið sig.)

    • Pistill Halldóru fór sannarlega út fyrir hefðbundinn ramma en mér fannst þessi nálgun mjög skemmtileg og óvenjuleg. Ég man eftir skrifum Þórðar vinar míns Helgasonar og fannst þau einkum fyrir miðaldra vandlátt fólk með gráðu í íslensku. Sjálfur myndi ég höfða til barna og unglinga ef ég fengi málfarspennann afhentan.

    • Ég hef aðgang á netinu vegna fyrri starfa minna fyrir ríkið á ótilgreindum vettvangi. Hér var Mogganum sagt upp þegar Voldemort kom til starfa í Hádegismóum og við höfum þar að auki afþakkað ókeypis mánuði. Sunnudagsmogginn er oft ágætur en hversdagsmogginn er klósettmatur.

  3. Ég bloggaði sérstaka færslu um pistil Þórðar vinar þíns Helgasonar, „Vandinn að vinna í sjoppu“. Og nei, ég held að „miðaldra vandlátt fólk með gráðu í íslensku“ hafi almennt ekki fílað þann pistil, á a.m.k. afar bágt með að sjá það fyrir mér. Hugsanlega hefur fólk á efri árum með allt á hornum sér lesið pistilinn sér til staðfestingar á að allt sé á leiðinni til andskotans.

    Gísli frændi: Svo bregðast krosstré sem önnur tré 😉

Hvað viltu segja?

Please log in using one of these methods to post your comment:

WordPress.com Logo

You are commenting using your WordPress.com account. Log Out / Breyta )

Twitter picture

You are commenting using your Twitter account. Log Out / Breyta )

Facebook photo

You are commenting using your Facebook account. Log Out / Breyta )

Google+ photo

You are commenting using your Google+ account. Log Out / Breyta )

Tengist við %s